Er bit kv́nste vnd sinnes rat

Er bit kv́nste vnd sinnes rat·
swer singen welle von der scham·
wa von si wirt wc von ir kam
wcs^{[WS 1]} an den lúten tůt·
gar manicvaltig ist ir^{[WS 2]} tat·
wie dc doch eine si ir name·
si ist wilent schade vnd wilent vrom
nv boͤse vnd danne gv̊t·
scham ist vor argen werken gv̊t·
ist dc si missetat darinne wendet·
geschiht des niht reht als ein blůt·
nach arger tat· schame roͤtet vnd schendet·
scham ist niht gv̊t gegen gv̊ter tat·
si senket so den in der helle grúnde·
der hie dur sine schame lat·
dc er niht bihten wil die sine sv́nde·

Swar der verschamten schanden ham·
sich senken wil in menschen mv̊t·
dvr dc vro ere dannen var·
mit manig reiner tvgent·
da zwischen mischet sich ein scham
ir rat den eren helfe tv̊t·
dú widerstritet schanden schar·
mit maniger tvgent mvgent
dv́ scham dem mv̊te sa benimt
der schanden tat· vs eregerndem willen·
swc hohen eren missezimt·
dc kan dv́ scham in meschen herzen stillen·
dú scham ist gv̊ter eren hort·
die kv́sterichen meister hant gepriset·
dv́ reinen werk vnd kúschen^{[WS 3]} wort·
ir volge^{[WS 4]} beide leret vnd wiset·

Swa scham vs toͤrschen herzen kvmt·
dv́n ist bi tvgenden niht gezamt·
wan mag si wol zv̊ schanden zelen·
vnfrúhtig ist ir stam^{[WS 5]}·
dv́ scham eht niender zeren vrumt^{[WS 6]}·
swa sich der man des gv̊ten schamt·
swelh schame lert dc erger weln·
dc ist niht rehtú scham·
wen pfaffen sich der blatten schamen·
vnd grawe mv́nche schrotes ob den oren·
vnd hirten ǒch ir amtes namen
des si da lebent da bi so kiesent toren·
die pflegent alle tvmber sitte·
die sich des schament des si doh sint geret·
da ist dv́ schame vnschuldig mitte·
scham ist ein tvgent der si zv̊ rehte keret·

Anmerkungen (Wikisource)

1. Vorlage: wc.
2. Vorlage: ſin.
3. Vorlage: kúſche.
4. Vorlage: volget.
5. Vorlage: ſtan.
6. Vorlage: vurmt.