Dv́ lieben zit von hinnan můs

Dv́ lieben zit von hinnan můs·
der voglin grůs·
entwichen ist von sender not·
leit in der kalde rife tůt·
wa ist hin din blůt·
von blůmen vnd von rosen rot·
wa ist der anger gruͤne vn manger bǒme dach·
die hat der rîffe gar verhert·
vns it erwêrt·
vil wunnen die man húre sach·

Mir schat der rîffe noh der snê·
sit ich weis ste·
so lachelichen einen munt·
der als ein núwer rose entsprúst·
der sich entslúst·
noch roͤter ist er zaller stunt·
den treit min vrǒwe der ich nit vergessen mag·
ich froͤu mich din trut selig wip·
din reiner lip
ist wol min osterlicher tag·

Wer gesach ie wip so hêr·
vntz an das mêr·
so vint man niender ir gelich·
der truten der min herze gert·
wurde ich gewert·
von ir so were ich iemer rich·
ir liechten ǒgen blike· froͤwent mir den sin·
ir úber schoͤne hat die macht·
gegen swem si lacht·
des sorge ist endeliche hin·