Die Schedelsche Weltchronik (deutsch):252

251 <<<Vorheriges Blatt	Die Schedelsche Weltchronik    Blatt CCLII	Nächstes Blatt>>> 253
unkorrigiert	Dieser Text wurde noch nicht Korrektur gelesen. Allgemeine Hinweise dazu findest du bei den Erklärungen über Bearbeitungsstände.

 

CCLI verso:

Das sechst alter

Nach der gepurt cristi .M.cccc.xlvi. iar^[1] entstund zwischen den teu^etschen bru^eedern vnd Vladislaen dem ko^enig zu Poln von wegen der o^erter vnd gegent des ko^enigreichs ein auffru^or vnd komen bede tayl mit großem mechtigem volck zu krieg vnd streyt. aber die prewßen (entweders in der menig irs streytpern volcks oder auß frayssamkeit irs mu^ots frolockende) schickten erstlich durch einen heerolt oder parsafanten dem ko^enig zway schwerte des frids oder des kriegs dero eins welchs er wo^elt zenemen. also name der ko^enig das schwert des kriegs vnnd streyts an vnd ließe ime das segnen vnd begu^ertet sich damit. Als sie nw gegeneinander zu streyt zugen do schiket der ko^enig die Litawer die ime zu beystand komen waren vor hyn an die schlacht. mit denselben vermu^eedeten sie sich also hart das sie von den polacken die alßpald darauff nachdruckten ein schwere nyderlag vnnd plu^otuergiessung lydden. also das an demselben tag bey vierhundert bru^eeder des ordens mitsambt dem hohmaistere zu roß vergiengen. vil tawsent mann erschlagen vnd die vbrigen gefangen warden. Vnd dermaß gelanget Preu^eßner land (außgenomen Marieburg) an die Polacken. So warden ine die zwu^o stett Tantzka vnd Dorn darnach durch Casimirum den ko^enig zu Poln abgedrungen. der sprach das Preu^eßner land ein teil seins ko^enigreichs wer

Albrecht marggraff zu Brandemburg hat vor disen iaren wider die statt Nu^ermberg einen großen krieg gefu^eert vnd das stettlein Grefenberg das mit einer mawr vnd graben bewaret vnd vier meyl von Nu^ermberg ligt mit großem gewalt gestu^ermt. vnd als nw bede partheyen aneinander vil beschwerde vnd schadens vnd gehabter taglaystung gestillet vnd hingelegt. Vber ettliche iar darnach enstund ein krieg zwischen demselben hertzog Ludwigen vnd dem vorgenanten marggraff Albrechten beden mechtigen fu^ersten. als aber bede tail ettwielang mit großer ku^enmu^eetigkeit gegeneinander gekriegt hetten do wardt der krieg zu letst nach vil erliddner schlacht vnd nyderlag durch die andern fu^ersten teu^etscher land vertragen.

Ko^enig Ludwig zu franckreich

Lvdwig ko^enig Karls zu Franckreich sun hat diser zeit nach seinem vater das ko^enigreich ererbet. Derselb ko^enig karl was ein senftmu^eetig man aber tawber synn dann als er wider ko^enig Heinrichen von engelland vnd hertzog Jhanßen von Burgundi einen krieg erweckt vnd vil lewt erschlagen het do ward er zu letst mit großer mechtiger schlacht zertrennt vnd ime vil stett abgedrungen. vnd wo es got durch ein iunckfrewlein wunderperlich nit vnderkomen het so wer es vmb sein ko^enigreich gar beschehen gewest. Zu letst machet Nicolaus ein cardinal cartheu^eser ordens frid mit den hertzogen zu burgundi. den hieß er doch darnach hinderlistigclich erto^edten. das wz ein vrsach vil vnzallicher vbele die darauß folgten. Als nw diser Ludwig das ko^enigreich vnd herrschung erlanget do vertribe er vil seins vaters gu^enner auß dem ko^enigreich. vnd als er sich darnach vnderstu^ond die freyheit der kirchen zeuermyndern do machet er ime vil ro^emisch bebst widerwerwertig. Vnd nach dem das volck hertzog Karls zu Aquitania vnd Normandia von seiner weißheit wegen zu eim regirer begeret do wardt er auß zuschu^ob vnnd verfu^eegung diss ko^enig Ludwigs erto^edt. Als aber der adel des ko^enigreichs vnnd der hertzog zu Burgundi solchs verstunnden do verneweten sie den alten hass vnd neyd vnd machten ein pu^entnus vnd vberzohen disen ko^enig Ludwig mit heereßkraft. also das der hertzog von Burgundi in die Pickardey rayset vnd die statt Pichinetum erobert vnnd schlayffet. so wardt der ko^enig von den seinen verlassen vnnd wiche gein Parys. Aber der babst stillet darnach die sachen durch Bessarionem den Nicenischen cardinal. Diser Ludwig starb zu Remis nach der gepurt Cristi M.cccc.lxxxiiii. iar^[2] vnd ließ Carolum seinen erstgepornen .xv. iar alt der noch lebt einen nachkomen des ko^enigreichs

Georgius ko^enig zu Beheim

Georgius von Pogiebrat ein Beheim vnderstund sich nach absterben Laßlaws ko^enigs zu Hungern vnd zu Beheim in geforderter versammlung des adels vnd der lantherren fu^erzegeben. wie das ambt oder pflegnus seiner gubernation sich mit tod des gestorben ko^enigs nit geendet het. demnach ergaben sich die von Prag alßpald on verzug in sein gubernation. vnd er wardt zu ko^enig verku^endt. dann er wz zu haws vnd zu feld also geschickt das ime zu handlung seiner sachen weder rats noch alters manglet. Vnnd wiewol er sich einen gu^oten cristen veriahe vnnd zwayen bischoffen an ire hend gelobet vnd auff das heillig ewangelium einen ayd schwu^ore das er nach empfangner kro^enung hinfu^ero der heilligen ro^emischen kirchen getrew vnd gehorsam sein wolt. darauff er dann durch kaiser Friderichen bestettigt wardt. yedoch hielt er sich in disen dingen allen widerwertiger vnd trewloser weiß vnd beschu^etzet vnd beschirmet die behmischen ketzerey. darumb wardt er vnd das gantz Behmisch reich durch babst Pium vnd Paulum schwerlich verpannt vnd verflucht vnd starb also nach der gepur Cristi .M.cccc.lxxi. iar.^[3]

Machomet der Tu^ercken kaiser hat nach vertreibung Thome paleologi des Kriechischen kaisers vnnd seins bruders im .M.cccc.lx. iar^[4] Peloponessum vnd nach gefengknus vnnd erto^edtung des Trapesunthischen ko^enigs desselben iars Pontum. vnd darnach Mitilenam erobert. So belegerten die Venediger Corinthum. aber die Tu^ercken komen mit gewalt vnd zwungen die cristen zu den schiffen zefliehen. Zu letst ru^estet sich der hertzog zu venedig mit treffenlicher schiffung vnd als er gen Anconam zu lendet vnnd von babst Pio der noch gaystet ab der ho^ehe von verrnen gesehen ward do verschied der babst in großer glori.

CCLII recto:

Kaiser Friderich geprauchet sich keins weins außerhalb malzeit. In dem nachtmal truncke er den allerleichtisten wein doch mit wasser gemischt. Nw rieten die ertzte Leonore der kaiserin die in irem haymend nye einichen wein genossen het das sie in teu^etschem land (das dann kalt wer) wein trincken solt ob sie anders fruchtper vnd geperhaftig werden wo^elt. Als aber solchs an den kaiser gelanget do forderet er Eneam siluium vnnd sprach zu ime. Geehin vnd sage der kaiserin. Ich wo^elle lieber ein vnperhaftige dann ein wein sawffende gemahele haben ob sie mich liebet so hasset sie den wein. Als nw die kaiserin dise werbung vernomen het do sprach sie. wiewol ich dem gescheft vnd gehaisse meins gemahels also gern gehorsam bin als gern ich lebe. yedoch wenn der kaiser mir wein zetrincken gepu^ote so wolt ich mir ee wu^enschen zesterben denn gehorsam zeerscheinen.

Mathias ko^enig zu Hungern

Mathias Johannis huniadis des ko^enigreichs Hungern gubernators sun hat nach absterben ko^enig Laßlaws on erben das benant ko^enigreich mit verwilligung des adels. der lantherren vnd o^ebern daselbst erobert. Dess vater guberniret das ko^enigreich mit einer eyßnin ru^oten. vnd wardt auch nicht mynder dann als ein ko^enig gehalten. vnnd als er die Tu^ercken bey kriechischen weissenburg ernider gelegt het do starb er vnlang darnach. Als aber (wie hieuor gemeldt ist) der graf von Cili durch Ladislawen des obgenanten Johannis huniadis eltern sun geto^edt wardt do hieß ko^enig Laßlaw denselben Ladislawen enthawbten vnd den Mathias gefangen gein Prag an dem tag daran ko^enig Laßlaw starb. den name Georgius pogiebrat der Bemisch gubernator in sein hu^ot vnd bewarung. Nicht lanng darnach wardt er in dem xviii. iar seins alters zu ko^enig zu Hungern ernennt. auff große pu^ergschaft vnd verschreibung außer ferngknus gelassen vnnd in sein Hungerisch ko^enigreich gefu^eert. Aber nach dem der ro^emisch kaiser vermaynet das ime dasselb ko^enigreich zu stu^onde darumb entstunden vil auffru^or vnd krieg zwischen inen. doch blibe das ko^enigreich dem mathias. Der was ein ernsthafter fleißiger vnd starcker beschirmer vnd verfechter des cristenlichen glawbens wider die Tu^ercken vnd hat vil großer kempff vnnd streyt wider sie erstanden. vil abgedrungen vnd ire land vnnd gegent mit prand. verheerung. rawb vnd todschlagung vilfeltigclich beschedigt. Auch wider Casimirum den ko^enig zu Poln. in beheim gekriegt. vnd sich zu letst doch mit ime befridet. dermaß das Pannonia. Hungern. Merhern vnd Schlesia dem ko^enig Mathias. vnd das ko^enigreich zu Beheim dem Vladislao des Casimiri sun bleiben solten. Als diser Mathias mercket das ime kaiser Friderich widerwertig was do befridet er sich mit dem Tu^ercken vnd stellet sich wider den kaiser. dem drunge er ab die statt Wienne. daselbst starb er .M.cccc.xc. iar.^[5] vnd wardt gein Stu^olweyssenburg gefu^eert vnd alda begraben. Er het Ferdinandi des ko^enigs zu Neapolis tochter zu der ee.

Nicolaus von cusa cardinal

Nicolaus von Cusa ein Teu^etscher vnd des tittels sancti Petei ad vincula ein fu^ertreffenlicher vnd hohgelerter cardinal ist diser zeit in ru^om vnd preyse gewesen[.] Vnd was ein so^elcher gu^oter man das wenig beßrer lewt zu seiner zeit geporn warn. dann er was ein ernstlicher feind aller laster. ein widersacher aller eregirigkeit vnd werltlichs geprengks. an gentzigkeit des gemu^eets vnwandelper: erberer mu^ee vnnd arbait bis in sein hohs alter vnuerdrossen. in gu^ottettigkeit vnd danckperkeit wunderperlich. vnd also vberflu^eßig in aller schriftlichen weißheit. wenn yezuzeiten von einichem ding zereden vnuersehenlich fu^erfiele so kund vnd weßte er also schickerlich. vo^elligclich vnd gnu^ogsamlich dauon sagen als ob er sich dasselb ding allain zelernen geflißen het. Er was zumal ein wolgesprechig vnd des lateins fertig man. vnd aller hystorien vnd geschihten. nicht allain der newen vnd andern ku^ensten hoherfarn. Auch des babstlichen vnd kaiserlichen rechtens wolgelert. vnd ein scharpffer außleger der heilligen schrift. vnd hat vil treffenlicher vnd lo^eblicher bu^eecher vnd schriften gemacht vnd hinder ime gelaßen[.] Diser Nicolaus wardt auß vrsachen das er sein Brixische kirchen fleißigclich beschirmet von hertzog Sigmunden von o^esterreich gefangen vnd in eim erbern kercker enthalten. Darumb wardt babst Pius wider denselben hertzogen zu vngnad vnd mißgunst bewegt also das er ine mit schwern geistlichen penen belu^ode. Zu letst wardt diser Nicolaus frey geledigt vnd die sachen befridet. Vnnd als babst Pius zu Ancona auß diser werlt mit tod verschiede do starb diser Nicolaus cardinalis zu Rom.

Bessarion ein kriechischer cardinal

Bessarion ein cardinal vnd Sabinensischer bischoff vnd auch ein patriarch zu Constantinopel was diser zeit bey dem babst Paulo vnd menigclichem so^elcher fu^ersichtigkeit. werltwitzigkeit. vbung. erfarung. schicklichkeit vnnd glawbwirdigkeit gehalten. das von hohen treffenlichen sachen vnnd gescheften nichtz gehandelt noch fu^er beschließlich geachtet wardt es beschehe dann in beywesen vnd mit rat diss hohberu^embten mans. Er was in schriftlicher weißheit also erleu^echtet das man glawbet dz seiner zeit nye nymant mer gelesen. gelesne ding baß verstanden vnd clerlicher geschriben het denn er. Vnd wiewol er mit sachen vnd gescheften den gemaynen cristenlichen stand betreffende beladen wz so vnderstund er sich mit inpru^enstiger begirde seins gemu^eets die lere des naturlichen maisters Platonis zebeschirmen. Zu letst als er gein Franckreich in botschaft geschickt wardt vnd fride machet do starb er am widerwege.

---

1. 1446 n. Chr.
2. 1484 n. Chr.
3. 1471 n. Chr.
4. 1460 n. Chr.
5. 1490 n. Chr.