Die Schedelsche Weltchronik (deutsch):163

162 <<<Vorheriges Blatt	Die Schedelsche Weltchronik    Blatt CLXIII	Nächstes Blatt>>> 164
unkorrigiert	Dieser Text wurde noch nicht Korrektur gelesen. Allgemeine Hinweise dazu findest du bei den Erklärungen über Bearbeitungsstände.

 

CLXII verso:

Das sechst alter

Sant Sebaldus

SEbaldus der wirdigst vnd heilligst peichtiger hat diser zeit (als etlich sagen) an lere vnd heilligkeit in teu^etschen lannden gereichßnet.^[1] Er ist auß hohgepornen eltern entsprungen eins ko^enigs zu tennmarckt vnd der kewschisten ko^enigin sun. die dann mit gelu^ebd vnnd bete von got dise frucht erworben haben. Er was von iugent auff zu zucht vnd lernung der schrift gehalten vnd zohe zu begreyffung der freyen ku^enst in seiner iugent gein parys: Als er nw darinn hoherfaren ward do wardt ime ein gar scho^ene iunckfraw von ko^enigclichem franckreichischem stammen geporn eelich vermehelt: aber er hat der werlt geprengk vnd sein ko^enigreich verachtet vnd sein allerhu^ebscheste gesponsen bey nacht verlaßen vnnd ist in ferre gegent vnd aynsidelschaft gegangen. alda .xv. iar heilligclich lebende. Als er aber darnach von andacht wegen gein rom kome do wardt er von babst Gregorio dem andern^[2] zu den teu^etschen zeziehen vnd ine zepredigen geordnet. vnd het Willibaldum vnd Wunibaldum die gebru^edere zu weggeferten.^[3] Also hat er erstlich bey den Longobardischen. darnach zu Regenspurg an lere. tugenten. vnd wunderzaichen geschinen. vnnd zu letst bey Nurmberg in ayno^ede der weld ein fast dienstlichs. beschewlichs vnd volkomens leben bis in sein ende gefu^eret. alda er dann zu sampt der lere die er dem volck tet in ru^om der wunderzaichen fast nammhaftig worden ist. Als er nw zu letst zu großem alter raichet do kome er in sant Marteins cappeln zu Nurmberg do yetzo ein closter sant Benedicten ordens vnd zu sant Egidien genant ist.^[4] daselbst verschiede er seligclich. Dess heilliger leichnam wardt von vngezemen ochßen an die statt der begrebbnus gefu^ert. alda dann ein scho^ene kirch in seinem namen gepawt wardt. Disen Sebaldum haben darnach die ro^emischen bebst von seyner manigfeltigen wunderwerck wegen in die zal der hailligen beichtiger genomen. Sunderlich babst Martinus der fu^enft^[5] hat diss heilligen sant Sebalds festt am .xix. tag des monats augusti zebegeen gepoten. Darumb wirdt diser heillig Sebaldus der Nurmbergisch patron vnd hawßuater von den zu nurmberg ierlich mit lo^eblicher begengknus geeret. dann dise lo^eblich beru^embt statt auß verdienstnus diss irs wirdigsten patrons zunemung in eren vnd wirden empfindet.

Luitprandus der ko^enig

LVitprandus aisprandi sun der longobarder ko^enig^[6] empfieng noch in leben seins vaters das ko^enigreich vnd regiret .xxxi. iar vnd .vii. monat vnd was ko^enigclichs fu^erstenthumbs wol wirdig vnd groß gerads starcks leibs. vnnd also tetiger resscher[?] hand das nymant damit geschickter geachtet wardt. So was er an gerechtigkeit vnd gu^eetigkeit also achtper das nit wol zeerkennen was an welcher tugent er mer lobs wirdig wer. Er was auch ein fast gu^ot cristenlich man vnd ein solcher liebhaber go^ettlicher ere das er nynndert einiche gotzhewser on sein stewr vnd hilff erpawen ließ. auch hat er zu papia vil tempel mit wunderperlicher zierde auffgepawt. Carolus marcellus was sein geuatter vnd ime fast freu^endlich vnd schicket ime vil volcks zu hilff auß welschen landen wider die sarracen vnd sendet auch seinen sun Pipinum zu ime. im sein har (als gewonheyt ist) zebeschneiden. den empfieng luitprandus gar gu^eettlich vnd schicket ine mit begabungen seinen eltern wider haym. aber in dem .xii. jar seins ko^enigreichs ward er zu begirde der herrschung bewegt vnd fienge die stett vmb vnd vmb gelegen vnd vnderstund sich die stat rom zebelegern. also schicket babst Gregorius sein botschaft zu carolo dem ko^enig zu franckreich ine zebitten der statt rom vnd der kirchen zu hilff zekomen. do stellet Luitprandus auff begerung ko^enigs Caroli sein fu^ernemen ab vnd gabe den ro^emern vil abgedrungen stett wider.

RIcholdus ein hertzog der frießen wardt in disem iar auß der predig Wolframmi des bischofs bekeret vnd als er sich tawffen lassen wolt vnd in den tawff gegangen was do fiele ime ein zweifel zu also das er den eynen fu^oß herwider zohe vnd fraget ob seiner voreltern mer in der hell oder in dem paradys wern. vnnd als man ime saget ir wernn mer in der hell do ru^ocket er den andern fu^oß eylends auch widerherauß. vnnd sprach. Es ist lo^eblicher dem merern dann dem mindern teil nachzefolgen. also wardt er in seiner torheit betrogen vnd durch vnfu^erbetrachten tod verzuckt.

Sant Othmarus

DIss iars in ianuario warden zwen cometen gesehen der einer gieng vor. vnd der ander zu vesperzeit nach der sunnen.

OThmarus ein teu^etsch man wardt in schriften vnd an tugenten vnderrichtet. zu brister geweyhet. durch Victorem den graffen von seines andechtigen wesens vnd ru^oms wegen zu eim prelaten auffgenomen vnd zu eim abbt erwelet. Dasselb closter hat er an gu^eettern vnd gepewen fast gemeret vnd strengs massigs leben gefu^eert vnd als ein liebhaber der armen sie offt haimgesucht vnd inen ein spital gepawt. doch wardt er von seinen mißgu^ennern verfolgt. einer frawen beschuldigt vnnd darumb in ellend verschickt. darinn starb er. nach zehen iarn wardt er in sant Gallen closter durch Costnitzer see mit großen wunderzaichen vnd stillung der vngestu^emigkeit gefu^eert.

CLXIII recto:

der werlt

Blat CLXIII

Concili zu rom von der pild wegen

Babst Gregorius der drit hat in sant peters kirchen zu rom ein concili schier mit tausent bischoffen gehalten. vnd darinn (als vorgemelt ist) den kaiser leonem des kaiserthumbs vnd menschlicher gemainschaft entsetzet. darumb das er der heilligen pildnus zerru^edet het. In demselben concili wardt erkant die pilde in hoher erwirdigkeit wieuor zehalten. vnnd das die ere erbietung der heilligen pild zymlich wer. vnd die verbrecher diss statuts vnd ordnung solten in dem pann sein. Vnd als sich aber kaiser leo offenlich an dem babst nit rechen mocht do gepote er das alle des ro^emischen reichs vndertanen aller heilligen martrer vnd engel seu^eln vnd pild in den tempeln abschaben vnd hinthu^on solten. zu vermeydung (als er saget) der abgo^eterey. welcher aber das nit thet den wolt er fu^er einen offenbaren feind halten. Aber Gregorius vermanet alle cristen menschen nach disem concili das sie sich auß forcht oder gepot des kaisers in solche irrung durch kainerlay weiß verlayten laßen solten.

Carolus marcellus

CArolus marcellus Pipini des eltern sun wardt diser zeit zu verwesung des ko^enigclichen franckreichischen pallasts gesetzt nach absterben Pipini des kurtzen. Diser Carolus was des pipini einiger sun marcellus zugenambt auß Calpiade seiner ersten gemahel geporn. Er liess auch Plectrudim seinen andern gemahel. die eret Carolus nit als ein stiefmuter sunder als sein aigne gepererin. Aber nichtzdestminder trachtet das neydig weib auff abtilgung diss jnglings. dann als Dagobertus der jung ko^enig auß antreybung ragnifredi wider die herrschung pipini volck sammlet do het Carolus wo er auß listigkeit nit empflohen wer sein leben vnd herrschung in dem kercker verlorn. Vnlang darnach als diser carolus auß fangknus ledig wardt do starb Dagobertus. Nw sammlet Carolus in rachsaligem gemu^eet wider Chilpericum den ko^enig vnd Ragnifredum seinen gubernator ein groß heer. In dem ersten streyt wendeten sich die zwen in die flucht vnd ließen Carolo einen großen obsig. Darnach wolt er sich auch von dem haymlichen neyd seiner stiefmuter ledigen vnd fu^eeret das heer fu^er Co^elne alda sich dann plectrudis sein stiefmuter mit dem verlassen schatz pipini enthielt. die eroberet er mit gewalt mitsambt dem schatz vnd der stiefmuter. aber die stiefmuter kom haymlich daruon vnd zohe vber die thonaw zu den Bulgaros. also behielt er das ko^enigreich allain wiewol neben vil widersachern. aber er bestritte sie alle. Darnach zohe er vber Reyn vnnd machet ime die Sachsen Schwaben Bayern vndertenig. Als er nw verstund das die sarraceni von Eudone dem hertzogen zu aquitania seinem widersacher in galliam zeziehen gefordert weren do zohe er inen mit großer heerscraft entgegen vnd schlu^og der Sarracener bey dreymalhundert vnd fu^enfundsibentzig tausent zu tod. vnd warden doch auß den franckreichischen nit mer dann bey anderhalb tausenten erschlagen als die geschihtbeschreiber setzen. Darnach zohe er vber die burgundier die bestritt er vnd hieß sie auß beschaidenheit gesellen. Nachfolgend wendet er die waffen wider die Frießen deßmals noch abgo^ettereyer. nach vberwindung derselben keret er wider anhayms. Er erobret Lyon Arelate vnd Massiliam von den visigothiern. die forderten athimum den sarracenischen ko^enig zu hilff. do rayset Carolus mit großer heerscraft vber den rhodan vnd eroberet die statt auinion mit gewalt. do erschlu^og er die sarracen vnd ru^ecket gein narbone. vnd nit ferr von dannen in das tal corbaria. daselbst was ein ebne zu dem kampff vnd streyt gar schickerlich[.] Nw maynet amoreus der ander sarracenisch ko^enig hispanie Carolus het sich in die flucht gewenndt vnd zohe in dasselb tal. do komen bede heer miteinander zu streyt. aber amoreus lag ernider so fluhe Athimus auff eim schiff in hindern hispanien. vnd also warden die sarraceni gezemet. Von dannenher komen alle visigothi an den gewalt caroli. Zu letst als Carolus mit schwerer kranckheit beladen wardt do taylet er die eroberten ko^enigreich vnd lande nach rat seiner freu^end vnder die su^ene. also gefiele Carolomanno dem eltern sun osterreich oder osterwalden vnd schwaben land. vnd pipino dem ju^engern burgundi vnd franckreich eins teils. vnd Carolus starb im .xxxv. jar seiner herrschung.

SAnt Augustins leichnam der vor dritthalbhundert iarn auß yppone der statt gein Sardiniam gebracht wardt (als das Wandalisch volck die cristenlichen kirchen in Aphrica den arrianischen ketzern zebeflecken eingegeben hat) ist in disem iar auß fleiß des longobardischen ko^enigs Luitprandi von Sardinia gein papiam gefu^eet vnd an ein erliche co^estliche statt in sant peters kirchen gelegt worden.

---

1. Sebaldus von Nürnberg soll im 8. Jahrhundert gelebt haben und wird spätestens seit 1070 als Heiliger verehrt.
2. Gregor II. war von 715 bis 731 Papst.
3. Die Brüder Willibald von Eichstätt (um 700–781/87) und Wunibald (701–761) wurde 738 oder 739 von Papst Gregor III. nach Süddeutschland entsandt.
4. Das Egidienkloster Nürnberg bestand von ca. 1140 bis 1525.
5. Martin V. war von 1417 bis 1431 Papst.
6. Liutprand war 712–744 König der Langobarden.