Die Schedelsche Weltchronik (deutsch):091

090 <<<Vorheriges Blatt	Die Schedelsche Weltchronik Blatt XCI	Nächstes Blatt>>> 092

korrigiert	Dieser Text wurde anhand der angegebenen Quelle einmal Korrektur gelesen. Die Schreibweise sollte dem Originaltext folgen. Es ist noch ein weiterer Korrekturdurchgang nötig.

XC verso:

Das funft alter

Agrippa oder Colonia. das ist Co^eln. auff der lingken seyten amm Rheyn ist nit allain der gegent vnnd des gelegers. sunder auch des fluss vnnd volcks halben ein ho^ehberu^embte vnd achpare statt in nidern te^etschen landen gelegen. die hat (als Sicardius cremoneus helt) zu den zeiten Enee des Troyaners. von einem Troyanischen Colonus genant den anfang genomen. vnd ist darnach auß gehaiß vnd gescheft Claydij des ro^emischen kaysers. der dann ein gemahel der frawen Agrippine was. als das volck Vbij genannt von den schwaben veriagt wardt. geauffet vnd besteu^eret. vnd von derselben frawen auß irem geslecht herkomen Agrippa genant worden. vnd also hat das volck Vbij daselbst zewonen angehebt. aber die warhaftigern vnd glawbwirdigeren geschihtbeschreiber alle sagen. das. M. agrippa ein stiffter diser statt gewesen sey. dann wiewol er anhayms vnd außwendig vil achtperer gepew auffgerichtet hab so hab er doch dise statt von allen andern die wirdigern gesetzt. nach seinem namen genent zewerden. dann er was ein trefflicher vnd werder pawmeister vnd kriegsman gehalten. den ime der keyser Augustus zu einem ayden: oder tochterman seiner geliebten ainigen kayserlichen tochter auß der gantzen werlt erwelet. Derselb ordnet dise statt wider die statt Tryer machtiglich. das er darauß die feindschafft vnd zwitrachtigkeit der Gallier stillen vnd nidertru^ecken mo^echt. Aber lang darnach hat Hildericus der konig zu frankreich Egidij des Ro^emers gu^enner vnnd anhenger auß diser statt Co^eln vertriben daselbsthinein Frantzosen gesetzt. vnd auß der Frantzosen einwonung. dem latein nach Coloniam genennt. wiewol ettlich sagen. das die. der Ro^emer einwonung gewesen sey. Dise statt ist eins mals. dieweil sie der ro^emer gesellin was mit wunderperlichen fewr verzert worden. darinn waren ein Capitolium:gepew vnd gewonheiten gleich den Ro^emern. inmaßen dann allain das dort rate des frids vnd kriegs gehandelt warden. so pflegen abhie hohberu^embt iungling vnd iunckfrawen got dem almechtigen nachtlichs lob in ewiger ayntrachtigkeit zesingen. Alda enmitten in der statt syht man den scho^ensten vnd doch nochmals nit gar außgepawen tempel. den sie den hohstifft nennen. daselbst sind der heyligen dreyer konig leichnam. vomm aufgang bis zum nidergang des sunnen in dreyen spru^engen dahin gefu^ert. die dann (als wir lesen) den himlischen konig ettwen in der krippen wechtzende mit gaben geeret haben. Diss ist ein freyhe vnd namhaftige ertzbischofliche hawbtstatt. Der ertzbischoff daselbst ist ein curfu^erst des heiligen ro^emischen reichs vnd ein weler yezuzeiten eins ro^emischen konigs. Daselbst haben vil menschen an kunst vnnd heiligkeit geleu^echtet. als sand Seucrinus daselbst bischoff. vnd Albertus magnus. des leichnam bey den predigern ligt. alda haben fu^enftzig auß der schar Thebeorum ir leben geendet. So hat sand Vrsula mit den aylfftausent iunckfrawen. vnnd etliche andere daselbst die kron der marter verdient. aber sich ist zeuerwundern der burgerlichen syttlichkeit. gestalt

XCI recto:

Blat XCI

der werlt

der statt tapfferkeit der mann vnd der weiber hu^ebschheit vnd sauberkeit daselbst. Von einer alten gewonheit der weiber alda schreibt Franciscus petrarcha der es gesehen hat. dann an sand Johanns der tauffers abent so die sunn nidergeet so samelt sich ein vnglewpliche große menig der weiber amm gestadt des fluss die tuncken denn mit auffgestraiffen ermeln bis hinder den elenpogenn wolriechende krewter darein vnd waschen ir schneweiß hennd vnd arm darauß vnd werffen alle anligende widerwerdigkeit des gantzen iars hinein. das der fluss dieselben hinfu^eren vnd fu^erbas fro^elichkeit bringen sol. O ir zeuil seligen nachpawrn des rheins der euch ewrer du^erftigkeit also reinigt vnd abwescht. das doch weder in oberm teu^etschen land die thonaw noch in welschen landen der Padus. oder die Tiber iren nachpawrn nie thu^on mochten. Bey Co^eln ist ein stat Ach genannt. ein stu^ol des großen kayser Karls. vnd daselbst in einem marmolsteinem tempel ein wunderwirdiges grab desselben fu^ersten. derselb hat geordnet das sein nachkomen amm reich daselbst die ersten kron vnd wirdigkeit des ro^emischen kayserthumbs annemen sollen. als dann noch hewt bey tag beschiht vnd fu^ero beschehen wirdt. alle dieweil die teu^etsch nacion den zawm des Ro^emischen reichs hanthabt.

L. Pomponius ein geschihtbeschreiber vnd wolredner ist zu disen zeiten achtper gewesen. als Eusebius setzt. der hat ein buch gemacht drinn er außgemessen wie weit ein statt von der andern lige.

Leoneus was ein hohgelerter grammaticus vnd ein gefreyter Gn. pompey. der hat auß befehl desselben pompey seins herren ettliche außlegung in der ertzney die dann pompeyus nach vberwindung Metridaris in seiner beheltnus fande in latein gebracht. dann Metridates was auff die ertzney geflissen also das er von allen seinen vnderthanen ertzney erforschet. vnd die beschreibung vnd auffzaichnus derselben in seinen gesperren verließ.

Agrippa ein tochter ma Octaviani ein außpu^endiger pawman. hat in seiner pawmeisterschaft zu rom vil gepew vnd vnder andernn vij^c. see gemacht vnd der statt Co^eln iren namen nach ime. als obgeschriben steet gegeben.