Die Schedelsche Weltchronik (deutsch):029

028 <<<Vorheriges Blatt	Die Schedelsche Weltchronik    Blatt XXIX	Nächstes Blatt>>> 030
fertig	Fertig! Dieser Text wurde zweimal anhand der Quelle Korrektur gelesen. Die Schreibweise folgt dem Originaltext.

 

XXVIII verso:

Das drit alter

Lacedemonia was ein stat des lands Litaonie in Achaya. vnd wardt von Lacedemone dem sun Jouis gepawet. von der kriechysch land den namen hat empfangen. dieselb statt was auch sunst genant Sparta. Aber Herodotus setzt das Lacedemonia ein land. vnd Sparta ein stat darinn gewesen sey. doch wird ye ains fu^er das ander verstanden. Aber waru^emb sie Sparta genant sey worden das setzt Justinus. vnd spricht das das geslecht der Spartanier in dem. l. iar des ko^enigs Ozie nach absterben Altumenis des ko^enigs der Lacedemonier. vnd nach verzerung irs ko^enigreichs den anfang gehabt hab. vnd Cicero schreibt von den spartanischen iunckfrawen das sie zu schicklicher tattigmachung irer leib vnd zu u^ebung der ritterschafft geflisner weren dann zu erobrung vnd geperung der kinder. daru^emb waren sie auch (als Virgilius sagt) mit irn klaidern von anderen gesundert. Der erst ko^enig der Lacedemonier was Euristeus ein kriechysch man von Abrahams gepurt im. xcviij. iar. Aber Agesilans was ir sechster ko^enig. der wer von seiner sitlichen tugent wegen der vnto^edlichkeit wol wirdig gewesen. vnd het seinen vrsprung von Hercule. Er erobert das reich in seiner iugent. vnd was alweg ein halter vnd layster trawens vnd glawbens. Item Licurgus was ein fu^erst vnd gesetzgeber der Lacedemonier. vnnd ein hoherleu^echter man. vnd vnder den weysen wundeperlich hoh geachtet. von dem Plutarcus. Valerius Justinus vnnd Arestotiles vil geschriben haben.

Mercurius was in vil ku^ensten erfaren die leret er die menschen vnd wardt als ein got geachtet. vnd all poeten schreiben das er der erst pot oder tulmetscher der go^etter gewesen. vnd ein got der gesprechlichkait. ein gewerbstat der kauflewt. ein bot der dieb vnd ein tulmetscher der go^etter genant worden sey. vnd hat die siben saytigen leyren erfunden. Er wz auch in aller art der kunst vnnd su^enderlich natu^erlicher kunst hohgelert. also das er (als sie sagen^[1]) mit seiner gerten vnd krewtern die todten erweckt. daru^emb wardt er nach seinem todt vnder den go^etern gezelt. vnd der stern mercurij nach im genant.

In disem dritten alter regirtten die weiber Amazones. c. iar. dauon hieuor geschriben stet. vnd brachten mit grawsamen kriegen vil stett in Asia vnd europa vnder sich: Ir ko^enigin waren Marsepia vnd Lambeta. Sinope. Anthiopa. ypolite. Orothia vnd Panthasilia. die erslug Pirrus. Achillis sun vor troya.

Bachus fand zu erst den wein in kriechen land. vnd ward fu^er eynen got gehalten. Er gab auch andern gegenten den wein vnd leret die teu^etschen auß gersten getranck machen.

Omagirus hat zu erst die ochsen zu dem geprauch des pflugs vnd der agkerung gefu^eget.

XXIX recto:

Blat XXIX

der werlt

Ynachus der erst ko^enig der kriechen hat von der gepurt ysaac im. lx. iar zeregirn angefangen. vnd. l. iar geregirt. vnd nach im gelassen ysidem die ko^enigin egypti. vnd Phoroneum seinen sun. der nach im regiret: Also ist zu diser zeit das ko^enigreich der kriechen vndter ynacho entsprungen. vnd durch. xiiij. ko^enig bis auff die zeit Baroch vnd Delbore der richter israhel bestanden. vnd als nw zu derselben zeit Criseus nit williglich geto^edt wardt. da verließ Perseus auß forcht die kriechen vnd wendet das ko^enigreich in der Micener hand. nach dem bis daselbsthin hetten geregirt Auriteus Acreus. auch zu disen zeitten hat Phoroneus erstlich dem kriechyschen land gesetz gegeben. vnd verordnet das die sachen zwischen den partheyen vndter einem richter gehandelt vnd entschiden werden solten. daru^emb sagen die recht gelertten. das die gerichtstat darinn gerichtlich sachen vnd hendel geu^ebt werden (zu latein forum genant) von demselben Phoroneo iren namen hab Item ysis sein swester sol (als sie sagen) seinen sun Apis genant zu einem mann gehabt haben. derselb sey auch von den egypciern fu^er einen got gehalten worden.

Phoroneus hat (als vorsteet) erstlich in kriechyschem land die gericht geordnet. vnd gesetz beschriben. vnd einen bruder gehabt der die lewt leret die iar vnnd monat zehalten. vnd auch zu ere den abgo^etter tempel vnd altar aufrichtet. daru^emb ward er auch vnder den go^ettern gezelt vnd mit opffer der ochsen geeret vnd phegoeus genant

YSis die tochter ynachi hieß zuerst Jo. Aber als sie in egypten schiffet vnnd daselbst die buchstaben^[2] oder schrifft erfande. vnd gesetze leret da wardt sie ysis genant. das nach egyptischer zungen souil ist als erde: vnd von irer fu^ertreffenlichkait wegen vil tugent vnnd lere wardt sie in egypten in grosser ere vnd wyrde gehalten. also das sie glawbten das dieselb ysis von himel herab gefallen wer. vnd sie hielten sie auch fu^er ein go^ettin. dann sie leret dz grob volck wie sie die erden pawen vnnd besamen. vnnd darnach auß den gesamelten fru^echten brot machen sollten.

Serapis der drit ko^enig der kriechen schiffet in egyptum vnd da er daselbs starb ist er der gro^est got der egypcier von dem plinden volck gemacht worden. deßmals entstund auch ein wunderperliche abgo^eterey von einem geplu^emenden oder manichfarbigen ochsen den sie Apim hießen. derselb wardt also lebendiger geeret. vnd do er starb do richtete die teu^efl der gleichen kalb auff das grob volck damit zebrtrigen. daher kome es auch das die kinder israhel die to^erheit mit anbettung des kalbs in oreb u^ebten. wiewol nichts erbermdlichers dann ein solche torheit in dem vernunftigen menschen mag gefunden werden.

Ein sintfluss beschahe in thesalia. die hieß daru^em deucalionis das sie in dessselben Deucalionis reich am gro^esten was. Item an dem hohzeitlichen tag des ko^enigs Serapis gieng ein ochs auß einem fluss vnd erhub sich in die luft. vnd stige dann widerherab in den fluss vnd erschine nit mer vnd wardt von den tho^ereten gepo^efel fu^er einen got gehalten

Argus was der vierd ko^enig der kriechen nach dem dasselb ko^enigreich auch argiuorum genant worden ist. diser wardt nach seinem absterben als ein got gehalten. vnnd mit templn vnd opfern geert. Zu den selben zeitten hat kriechen land angefangen getrayde zehaben. dann der samen wardt von andern enden daselbst hin gebracht

Iob der allerheilgist man ein lo^eblich ebenpild der gedult. in den gegenden iduinee vnd arabie auß Zareth seinem vater vnd Bosra seiner mu^etter geporn. was gerecht. aufrichtig. senftmu^etig. klug. tapfer. der zeit klu^eglich geprauchend. massig vnd wunderperlicher weyse gedultig. vnd vnder allen den in dem aufgang zu seinen zeiten wonende faßt reich. also das er. vij^m. schaff. iij^m. camel. v^c. ioch ochsen. vi^c. eslin vnd sere vil gesinds. vnd darzu auß seinem weib vi. su^en vnd drey to^echter het. vnd wiewol ine der herr durch anfechtung vnd versuchung des teu^efels hoh beweret. also das ime sein hab vnd gu^eter auch su^en vnd to^echter alle genomen. vnd er auch mit vil sweren gesweren beladen wardt. so hat er doch in disen dingen allen mit seinen lefftzen nit gensu^endet. sunder gesprochen. der herr hat es gegeben vnd wider genomen etc. Aber der herr hat im alles dz er im anfang het zwyfeltig wider gegeben. vnd er lebet darnach. c. xl. iar: vnd sahe seine kinder vnd seiner kinder kind bis in das vierd geslecht vnd starb also alt vnnd vol der tag.

---

1. WS:Vorlage: sogen
2. WS:Vorlage: bucstaben