Der kv́nig vō marroch hat d̾ b̾ge noch genv̊g

Der kv́nig vō marroch hat d̾ b̾ge noch genv̊g·
die guldin ſint zegǒcaſals deſ hoͤꝛe ich iehē·
Swie rich er ſi min wille mich nie dar getrůg·
Ich han ǒch dē vō barbarie wol geſehen·
vō dem vō ꝑſýan hoͤꝛe ich wūd̾ ſagē·
ſo hat noch mer gewaltes d̾ vō indýan·
Den kúnig vō latrize hoͤꝛe ich vil d̾ heidē klagē·
ſam tatē ſi dē ſoldan vō d̾ ſitricā·
Ich kēne ǒch wol dē pýlat da vō zaſamang·
ze babilōie iehent ſi wie gv̊t d̾ ſi·
ze alexandꝛie ſo enhabe ich dekeinē gedank·
d̾ kv́nig vō baldag ſol min iem̾ weſen fri·
vō kúnig coꝛnetin habe ich vil v̾nomē·
vúr thomas gat d̾ ioꝛdā dc iſt mir bekant·
ze irl̾m zem coꝛnetal bī ich komē·
Encolie iſt mir wol kvnt ī kiperlant·
in noꝛmanýa ich wc·
wie kvme ich da genas·
Fúr anthioch kam ich ze túrgis ſvnd̾ danc·
Da was d̾ tatē vil·
vō dē ich ſingen wil·
der vattan gar mit ſiner milte kriechen twang·
vō ſalnegge ein Roýs·
d̾ was vō mvnt foꝛtdýs·
Ze conſtantinopel was ein grande m̾feýn·
Dú wite troie lang·
dú wart gar an ir dank
zerſtoͤꝛet· da mvͤſe ſit dú rumanýe ſin·
ze kúnis erbēt och dú wib vn̄ niht die mā·
dar an ſo ſtôſſet pulgerie hoͤꝛe ich ſagē·
die valwē ſint gar vngeriht in tanagran·
des hoꝛte ich vil die ungern vn̄ die Rivſen klagē·
Der beheī ſolde wol dē richē hellē mitte·
Cecilie ſol dē keiſer weſen vnd̾tan·
Die ſardē hant ǒch manigē wūd̾lichē ſitte·
dē voget vō rome ich dike wol geſehē·
kerlingē ſtat mit gv̊tē vꝛide vn̄ da bi engellāt·
die zarle wolden iem̾ alſo weſē fri·
Dur artus wart bꝛitanie zekaridol genant·
die wilzen ſint geboꝛn da her vō tenebꝛie·
Fúnf ſterkú regna ſint·
er iſt vil gar ein kint·
ſw̾ d̾ niht weis in ſpangē· vn̄ ſint doch wiſſentlich·
Das eine iſt poꝛtigal
vn̄ hat dú richú tal·
ander iſt kaliz vn̄ iſt vnmâſſen rich·
Dˢ dꝛitte hat genv̊g· vn̄ iſt vō arragvn·
Dˢ vierde vert vúr kaſteln hin· gegē gramýzvn·
Den fúnftē vō nauarre· ſw̾ dē welle ſehē·
d̾ var da hin ſo mv̊s er mir d̾ warheit iehen·
Terramer d̾ fůrte ein her· zeoꝛenſe mit gewalde·
dc wc dien ſchampvneiſē leit· ſi v̾lurn da ivnge vn̄ alde·
ſtoꝛie manigvalde·
Oꝛavil ſchv̊f ſich grôſſe not
den burgē do zeleide·
da lag vil manig waleis tot
ze turniſ vf d̾ heide·
dc ſchv̊fen ſi do beide·
vienne hat legiſtē vl·
d̾ kunſt aſtronomie·
ze doleth ich niht lernē wil·
vō d̾ nigromācie·
niht gv̊t iſt zǒberie·
ýb̾nia hat d̾ ſchottē vil an ir gelǒbē ſtete·
zeNoꝛwege bedarf mā wol vúr kelte gv̊t̾ wete·
ſo hat ǒch d̾ tennemark· d̾ yſeln vil beſeſſen·
ſo mag ich des vō oͤſt̾riche zegv̊te niht v̾geſſen·
d̾ wc ein helt v̾meſſen·
bi dē wc ich geſeſſen·
Dˢ vs peierlant mag ſich ze kúnigē wol gelichē·
ich geſach nie fúrſtē me ſo miltē noch ſo richen·
ſo rehte lobelichē·
heia tanhuſere nv la dich iem̾ bi im vinden·
gar an allē wandel din· ſo liebeſt dich den kindē
vn̄ mag din leit v̾ſwinden·
Nime dē roſen kranz·
trage in d̾ gv̊tē an dē tanz·
vn̄ ſtrike in wol zeṕſe·
la din trurē ſin·
nim war der liebē frowē din·
ſi tanzet alſo liſe·
viuianz iſt clar·
Gvnrvn nimt ſin beſſer war·
noch bas dāne echelabvre·
belamvr ſi hat·
ſwāne ſi die zerlat·
ſo froͤit ich min parlure·
Salatin d̾ twanc mit ſiner miltē hant ein wūder·
ſam tet d̾ kv́nig ermērich dc lant zebelagvnd̾·
es wart nie bas geſtalt· dāne ich die mīnekliche vant alleine·
Mache fro mich ſelig wib· la tanzē mich an diner hant vil reine·
Seite ich vō růlande vil· dc tet ich ab̾ nach wane·
nv lâſſen wir die reken ſin· vn̄ alle die vō trane·
vn̄ die vō bꝛidamāne·
Ein ſchampenie wc da bi·
ein foꝛet ſtůnt da nahē·
da was manig belamýe·
die dar begvndē gahen·
do ſi min lieb erſahē·
wol vf min gůte
zv̊ mir an dē reigē·
mir iſt zemv̊te·
wir mvͤſſē vnſich zweigē·
nach d̾ vil liebē d̾ clarē der ſvͤſſen·
dú miner ſw̾e ein teil kan gebvͤſſen·
wa nv Jvte vn̄ loſe·
hie gat metze vn̄ roſe·
wa nv richi vn̄ tvͤtel·
hie get bele vn̄ gvͤtel·
Schone mit dē kranze·
ſlichet an dē tanze·
wart nie bas geſtalt ein lip·
nv la dich mīnē ſelig wib·
w̾dú creatv́rē
palúre·
Ir mv̄t bꝛan als ein rubin· gegē der ſvnnē glaſte·
ir kel ein adamaſte·
d̾ tvgēde vol ein kaſte·
wa nv floͤter herpfer dar zv̊ tambvr̾e·
gegē der gv̊tē
wol gemv̊tē·
dú iſt ſo froͤideb̾e·
wa ſint nv trumbvn̾e·
Nv ſvnge ich vil mere·
nv fúrhte ich vil ſere·
dc ſin die v̾dꝛieſſe ſwen ich g̾ne lere·
Nv iſt dē videll̾e ſin ſeite zerbꝛochē·
dc ſelbe geſchiht im alle die wochē·
Heia tanhvſere·
la dir niht weſen ſw̾e·
ſwa mā nv ſinge·
froͤliche ſpꝛinge·
heia nv hei·