Benutzer:Anvilaquarius

https://digital.onb.ac.at/OnbViewer/viewer.faces?doc=ABO_%2BZ221731903

[S. 86]

Ain Christlich lied gemacht auff den Namen der Statt Rauenspurg

In der Melodey / Erhalt uns Herr bey deinem Wort etc.

Rath hilff vnd trost Got schicket zu/
Allen die im vertrawen thun/
Er ist ir schierm vnd trewer hort/
Der sie erholt mit seinem Wort.

All menschlich hilff hat bald ain end/
Wer darauff trawt der wirt geschendt/
Drumb setz dein hofnung stets zu Got/
So wirstu nimmermehr zu spot.

Verlaß dich nit auff grossen pracht.
Vnd fo^ercht auch nit deß feindes macht/ [S. 87]
Dann wern der Feind noch ainst souil/
So machts doch Got selbs wie er wil.

Ergib dich dem Herren Jesu Christ/
Der aller menschen hailand ist/
Der dich in tru^ebsal tro^esten kan/
Den soltu alzeit ru^effen an.

Nit setz dein hoffnung auff die Welt/
Die tracht allain nach gut vnd gelt/
So doch solchs alles bald vergeht/
Allain das Gottes Wort besteht.

Selig ist der sein hoffnung gar/
Auff Got den Herren immerdar/
Setzet / dem ist die seligkait/
Berait / vnd bleibt in Ewigkait.

Preiß lob vnd Ehr sey Got allain/
Der vns hat pracht in sein gemain/
Durch Jesum Christum seinen Sun/
Vnd jn gesetzt zum gnaden Tron.

Vns wirt sein Wort vnd Sacrament/
Gar reichlich jetzund außgespendt/
Wie Jesus Christus leeren thut/
Der halt vns auch in seiner hut.

Recht zleben nach dem willen sein/
Verleih vns hailiger Gaist allein/
Das wir im glauben fo^este steen/
Vnd auff den wegen Gottes geen. [S. 88]

Gib vns dein gnad Got Vater milt/
Herr Jesu Christ sey vnser Schilt/
Tail mit vns dein barmhertzigkait/
Von nun an bis in ewigkait.

A M E N

Thomas Tilianus componebat.