Als sich min sinne

Als sich min sinne·
nach ir minne
stelsent vnde hulfe si mir·
es were ir
súnde nicht·
wan sender smerze·
wil min herze·
bringen in todes has·
ob si das·
nicht versicht·
vf mine trúwe· si wirt schuldig an mir·
ob nicht ir guͤte·
min gemuͤte·
troͤstet es ist min tot·
lieb die not·
klage ich dir·

LAs^{[WS 1]} dich erbarmen·
mich vil armen
wunden du tůst mir das·
du gist bas·
mir ǒch wol·
das tů noch reine·
wan ich meine·
dike mit trúwen dich
als ǒch ich
billich sol·
wan ich bin gar vnd gar lieb din eigen knecht·
min kúneginne·
bring mich inne·
trostes est nicht zefrů·
wan darzů
hast dú recht·

Das recht dú here·
lange sere·
brichest swie
lob von mir doch ie·
dir vs erschal·
vnd dir min trúwe·
ie so núwe
waren das alles veruie·
mich doch nie·
uberal·
doch mechte ich niemer ir lob gesingen gar·
doch sol die suͤssen·
min lob gruͤssen·
iemer so ich beste kan·
dauon wan·
si ist so clar·

Anmerkungen (Wikisource)

1. Vorlage: LAch.