Ferdinand III., Kristina von Schweden : Westfälischer Friede - Vertrag von Osnabrück | |
|
vnd zu solchen vornehmen Sachen gnugsamen Gewalt vffgetragen haben / daß sie mit den jenigen Commissarien, welche Käys. Mayt. zu dieser Abhandlung / mit satt- vnd gnugsamen Gewalt vnd Vollmacht instruirt, verordnet haben / oder verordnen mögen / entweder selbsten / oder durch jhre Subdelegirte, sich vnterreden / tractiren, handlen vnd ordnen solten / vff was Weiß / Weg vnd Mittel / daß beeden Theilen vorgenommener Zweck / als die Auffrichtung vnd Forsetzung / der Freundschafft vnd deß Friedens überkommen / vnnd stabilirt werden / vnd was derhalben besagte vnser abgeordnete / mit jenes Theils Commissarien, oder deren Subdelegirten / zu diesem End / entweder vor sich / oder durch jhre ebenmässige Subdelegirte tractiren / abhandlen vnnd verrichten werden / ohngeacht einer vnter solchen etwan / abwesend / Kranck / oder anderer hochwichtigen Geschäfften halben davon verhindert werden möchte / dasselbe wollen wir / vff die beste Art vnd Weiß / beständiglich zu halten / bey Königl. vnverbrüchlichen Trew vnd Glauben hiemit versprochen / vnd zugesagt haben / zu dessen mehrern gewißheit / haben wir dieses Eygenhändig vnderschrieben / vnd mit vnserm grössern Königlichen Insiegel / bekräfftigen vnd bestättigen wollen. Geben vff vnserm Königl. Schloß Stockholm / den 10. Decembris Anno 1645.
- Christina.
- L. S.
Ferdinand III., Kristina von Schweden: Westfälischer Friede - Vertrag von Osnabrück. Frankfurt: Philipp Jacob Fischer, 1649, Seite 93. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Westfaelischer_Friede_IPO_1649_093.jpg&oldid=- (Version vom 1.8.2018)