ez dvnket mich vnselikeit
dc ich mit triwen allen minen sin.
bewendet han. dc ez mich dvnket vil.
vnd mir der bresten[1] einiv des niht gelǒben wil.
ez wart von vnschvlden nieman so rehte we.
got helfe mir deich mich bewar.
dc ich vz ir hvlden kome niemir me.
wie sol mir din mit froiden iemer werden bv̊z.
mir tv̊t vil we deich dich mv̊z tragen.
dv bist zegroz doch ich dich tragen mv̊z.
die swere wendet nieman er entv̊z.
den ich mit trivwen meine gehort ich sinen grv̊z.
dc er mir nahe lege so zergienge gar min not.
sin vremeden tv̊t mir den tot.
vnd machet mir div ovgen rot.
swie vil der were ir enwurde ir niemer tac genomen. (so)
So gar bin ich ir vndertan
dc ich vnsanfte vz ir genaden mohte komen
ich froiwe mich des dc ich ir dienen sol.
si gelonet mir mit senften dingen vol[2]
gelovbet eth si mir dc wol. swenne ich ir clage
dc ich die not zeherzen von ir schvlden tragen[3]
dicke an deme tage.
ze weltlichen froiden iemer haben sol.
Dc ist ein wip der ich enkan.
nach ir wol (so) grozer werdecheit gesprechen wol.
sobich (so) si so man ander frowen tv̊t.
dc engenimet eth si von mir niht fvr gv̊t.
doch swer ich des si stet noch hv͛te ander stat.
dc[4] vzer wiplichen tvgenden nie fv̊z getrat
dc ist iv mat.
Verschiedene: Bibliothek des Literarischen Vereins in Stuttgart (Band IX). Stuttgart, 1844, Seite 82. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Literarischer_Verein_Stuttgart_IX_082.png&oldid=- (Version vom 7.1.2019)