|
Verschiedene: Codex diplomaticus Anhaltinus/Band 5 |
|
|
271
gever groschen Czerwester were ewigher und ghewisser ghulde in velde und in dorpe thu der Nut vortye wy uns ergnanthe vorste Segemund vor uns und unse erben und dun gancze aft icht alle des rechten, angevelles und anwardinghe, die uns und unsern erven und nakomelinghe ummer anghesterven und angelangen muchten, und hebben di recht und redelik ghegeven und voreygent, als eyghendumes recht is, der erwerdi- ghen ebdischinnen und dem ganczen convente und godeshuse des ergnanthen closters thu Czerwest thu einer vulkomen wederstadinghe darumme, dat uns di mergnanthen closteriuncfrowen upgelathen hebben thu unser herscop desse nageschreven gudere, als in der moele vor deme Breydenstratendore thu Czerwest ses wischepel rogghen cleynes mathes ierliker gulde, dy dar gevallen in sulken tyden des iares, als up unser liven vrowen dagh lichtmissen anderhalven wischepel, up sende Walpurgen dagh anderhalven wischepel, up sende Jacobs dagh anderhalven wischepel, up allen hiligen dagh ander- halven wischepel. Disse ses wischepel schal die molner in der vorgenanthen moelen malen ungemattet und ungelonet. Und si hebben uns ok vorlaten sulke gerechtikeyt in der- sulven molen, als twey swyn darumme thu mesten twelff weken van sende Mertens daghe wente thu unser liven vrowen daghe lichtmissen. Ok hebben sy uns upgelaten eyne weze, dy licht by der Czernitczer mole und di geheyten is der Schulten wysch und daran vierdehalven virding Brandenbursch sulvers, dy vor geleghen hebben thu der ebdischen werdecheit und amecht. Hirmit hebben si uns ok upgelathen eyne mole, dy gnant is Frederichsmoel, mit allem rechte und mit deme dike, die en vor gheghe- ven hefft alle iar ierlik vier wischepel rogghen grotes mates, twey wischepel upp sende Walpurgen dagh und twey wischepel up aller hiligen dagh, und di molner gaf densul- ven closteriuncvrowen alle iar ierlik eyne halve marg Czerwester were van deme dike eder si deden den dik sulven ut, weme sy wolden. Geschege ok dat di gudere thu der Nut, up den desse vorgetellede ierlike gulde und eygenschop licht, vordorven und van rove eder van brande vorwustet wurden, eder in welker wys di geergert wurden in dorpe ader in velde, eder wu dat thu queme, so dat den mergnanthen closteriunc- frowen thu Czerwest ere vorbenümede ierlike gulde, als achte wischepel rogghen grotes mates und twey marg Cerwester were, ut deme dorpe thu der Nut alle iar ierlik vullen- komenlik nichten wurden mit enander eder besunder in aller mate, als hirvor geschre- ven steit, so bekenne wy vorgnante furste Segemund vor uns und unse erven eyndrecht- liken, dat wy der erwerdighen vrowen Eatherinen Sterns, ebdischinnen in deme vor- benumeden clostere thu Czerwest, und eren nakomelinghen und deme ganczen convente und sammelinghe darsulves recht und redelik gegheven und voreygent hebben, als eygendumes recht is, also vele renthe als achte wischepel rogghen grotes mates und twey marg Cerwester were ewigher und gewisser gulde up den vorbenumeden molen thu Czerwest, di sy gerowelik dämme hebben und alle iar ierlik uphebben und up- nemen Scholen, benemelik in der moel vor dem Breydenstratendore thu Czerwest ses wischepel cleynes mates, in Frederikes mole vier wischepel grotes mates und den dik darsulves und mit allem rechte und an der Schulten wyschs vierdehalven vierding Brandenburschs silvers. Und si Scholen desse gulde upheben up sulke daghetyt und der ewechlik gebruken mit aller friheit und thubehoringhe, als sy uns di upgelatin hebben und als dat hirvor geschreven steit, ane alles geverde und ane allerleie arge- list. Und wurd is ok sache, dat wy ergnante vorste Segemund, unse erven eder unse
nakomelinghe desse vorgnanten molen vorkoupen musten ader weiden mit enander eder
Verschiedene: Codex diplomaticus Anhaltinus. Fünfter Theil. 1380-1400.. Dessau: Emil Barth, 1881, Seite 271. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:DE_CDA_5_271.jpg&oldid=- (Version vom 31.7.2018)
