|
Verschiedene: Codex diplomaticus Anhaltinus/Band 4 |
|
|
1379. August 24. Schloss Hoim. Die Fürsten Otto III und Bernhard V von Anhalt erwerben von dem Kloster Marienthal wiederkäuflich dessen Gut zu Eschenrode.
We Otte unde Bernhard van Gots gnaden fursten to Anhalt, graven to Ascharien unde heren to Berneborgh unde unse rechten erven bekennen unde betûghen in dissem openem breve, dat we ghededinghet hebben unde overeyn ghekomen sint vor unsen mannen up unsem huse to Hoym mid dem innighen manne hern Jane deme abbete, hern Hermene deme priore unde Hermen underpriore unde mit der meynen sameninghe to sante Mariendale des grawen ordens, dat we on don unde hebben ghedan sestigh mark Brandeborgschen silvers Quedlingborgscher wichte up ore gut to Hesekenrode unde up alle dat, dat darto ghehort, ses iare tu hebbene mid allen fructen, de darto gheho- ren, unde mid allem rechte mit alsuskeme underscheyde, dat se dysses vorbenomeden gudes binnen dyssen nesten vorscreven ses iaren van uns nicht scolen wedirlosen, sunder darna, wenne ze ore gut van uns wedirlosen willen, dat scolen se uns eyn half iar to- vornen vorkundeghen unde scolen uns unse vorbenomeden sestigh mark mit ghereydeme ghelde betalen unde wedirgheven in der stat to Quedlingborch, zo scole we unde willen on ore gut denne wedirentworden, alse we et van on hebben ghenomen. Were ok dat se dysses erghenanten gudes nicht wederlosen wolden oder en künden, so scolen se komen wedir to uns in unsen hoff unde sik vort mit uns vereynen, dat gut uns vort to latene up alsoghedane tid, alse hirvor begrepen unde bescreven is. Ok so scolen alle de breve, de uns van on ghegeven sint, bliven in orer macht unde scolen uns de halden stede unde unvorrükt. Dat we alle desse vorghescreven stukke unde articule stede unde gantz ane allerleye vorrukkinghe halden willen, dat rede unde love we er- ghenanten Otte unde Bernd fursten to Anhalt unde unse rechten erven deme vorbeno- meden abbete unde convente in dissem ieghenwordyghen unsem openen breve, de ghegheven is na Gots bort dretteynhundert iar in dem neghenundeseventeghesten iare, in sente Bartolomeus daghe des hylghen twelfboden. Hir over dissen dedinghen sint ghewest unse manne unde ghetruwen, de hirna bescreven stan: her Hans van Peyne ridder, her Johans Scrikke provest to Goslere, Kûne Spisere unde Hans van Ackenborch.
Aus dem Original im Landeshauptarchive zu Wolfenbüttel: von den beiden Siegeln hängt nur noch das leicht beschädigte Siegel des Grafen Bernhard der Urkunde an. In dorso von gleichzeitiger Hand: Illis de Anahalt de bonis in Nemore. — Vergl. I. no. 616 u. 647.
Verschiedene: Codex diplomaticus Anhaltinus/Band 4. Dessau: Emil Barth, 1879, Seite 413. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:DE_CDA_4_413.jpg&oldid=- (Version vom 31.7.2018)
