|
Verschiedene: Codex diplomaticus Anhaltinus/Band 4 |
|
|
Romer unde up alle syne brodere', myt en nummer vrede noch sone to eyner tyt oder to ewycheyt maken scolen noch en willen, it en si mit unser vorghesproken ome Al- brecht unde Waldemar unde erer erven vulbort unde ganze wille. Hirumme setten se uns unde unsen erven de stat to Pozwalk unde de ganze voghedyghe to Yagow unde to Burissow, laut unde manscap ghemeylik, de darto horen, vor teyndusent mark Bran- deborghesches sulvers na undersceyt unde beholdynghe erer breve. Weret dat yenighe heren, vorsten, stede, land oder lüde, se weren we se weren, de nu syn viende oder werden willen unser vorghenanten omen van Anehalt oder erer erven dorch des Romers willen oder syner brodere unde unser vorghenanten ome van Anhalt unde erer erven slote oder stede bestallen wolden oder bestalleden oder mit eme trecke oder mit eme here in ere lant toghen, weret dat de des nicht laten wolden oder aveton dorch user bede wille, so scole we unde willen ane allerleye arghelist ere viende syn gheliker wys, also des vorghenanten hertoghen van Beyeren des Romers unde syner brodere, unde scolen unde willen ere slote unde stede redden ghelyker wis usen eyghen sloten mit ganczen truwen. Och scole wy unde willen unse dener sende in de slote unde stede to hulpe unde to were up ere unde erer erven eyghene koste. Och wenne we oder use erven unse ome oder ere erven und ere denere to hulpe laden, so scole wy en gheven de koste. Wurden aver slote oder veste ghewunnen, wen se oder ere erven unde ere denere unde we oder unse erven unde unse denere to hope syn, de scolen er unde erer erven unde unse unde unser erven half wesen. Were och dat stede, slote, land oder lüde mit willen sich settende to unsen vorsproken omen unde eren erven, dar scole wy unde unse erven unde willen uns nycht darmede be- werren, wen se scolen sunder ansprake van unser weghen und unser erven seker be- sitten, unde scolen und willen en darto behulpen sy mit ganzen truwen. Hirut nehme wy de stat to Pozwalk unde de voghedighe to Yagow unde to Burisow in sodaner wis, also unser vorbenanten ome breve spreke unde der stat to Pozwalk breve. Och scal de stat to Pozwalk unde alle de slote, de dar syn unde ligen in der voghedye to Yagow unde to Burissow, de wy rede hebben inne unde noch mit Godes hulpe krighen moghen, und alle andere stede und slote unser vorghesproken leven omen und erer erven opene syn to alle eren noden. Weret och dat Godes gave gheve, dat de vorghenanten vorsten oder ere erven unde ere denere mit uns oder unsen erven oder unsen deneren in stryden oder in rowynghe vanghen vinghen unde wurde yeniych here ghevanghen oder hovet- lude, dar unsen omen oder eren erven unde uns oder unsen erven to unseme kryghe an beydent syden macht an leghe, se scolen half unse unde unser erven syn unde half ere unde erer erven. Aver andere ghemeyne lüde, riddere und knechte, scal men delen nach mantalen. Och love wy unser vorbenumden leven omen unde eren erven mit guden truwen ane allerleye arghelist, dat wy unde use erven de ratmanne unde de ghemeynheyt der stat to Pozwalk, de man in deme lande unde in der voghedye to Yagow unde to Burissow laten willen by alier rechticheyt, vryheyt unde wonheyt, also se ye van aldere beseten hebben, unde sunderliken bi alleme rechthe, als sy unse vorsprokene omen unde ere erven ghelaten hebben, unde an uns wysen. Och love wy, dat wy alle leen, si sint geystlik oder werlyc, de unse vorbenumeden ome vorleghen hebben, stede und ganz halden willen ane arghelist ghelyker wys, als wi se selver leghen hedden. Och wille wy de ratmanne unde meynen borgher to Pozwalk behalden by aller geystliken vriheyt, de si van aldere hat hebben unde bi unser vorghenanten ome tyden. Vortmer so love
Verschiedene: Codex diplomaticus Anhaltinus/Band 4. Dessau: Emil Barth, 1879, Seite 54. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:DE_CDA_4_054.jpg&oldid=- (Version vom 31.7.2018)
