|
Wilhelm Stieda (Hrsg.): Briefwechsel Hildebrand Veckinchusen |
|
|
Vruntlike grote tovoren. Wetet Hildebrant, guede (vrunt), dat ik jue lesten sante to Lubeke wart unde to Flanderen wart was, alzo ik jue de ok screff op 174 marc 7 scot. Darnest 12 dage na pingesten sante ik jue to Lubeke wart in Radeken Holsten 4 stucke Lemborgesch was unde 15 guelden, dyt stont tosamen alzo ic jue do ok screff 187 marc 11 scot. Item so sende ic jue nue in Johan Wuelve 2 stro wasses, darinne 3 stuecke Lemborgesch was, dat schone was; es de wegen 3 scheppunt 3 lyspunt myn 5 marcpunt; dat scheppunt stet erstes kopes 40 marc, summa 125 marc 9 schot ane dat ungelt.
Item so wetet de allun es al verkoft ein del op sunte Bartolomewes dach, ein deel ok op Mychgele; der rosinen wel neymant duerer den 1 marc, de stan noch al unvorkoft. Hir sin lude geven alzo guede rosinen vor 20 scot unde vor 22 scot, alze de juewe sin unde se seggen my dat en dat 100 stet ton hogesten 6 sl. gr., de juewe stan 12 sl. Dyt es ungelike kop, wo sal ic dan vorkopen lyk ander luden, wan myn guet so vele stet. Item de vigen late ik in den vaten stan unde ker se alle 14 dage umme; se seggen my, dat se beter in den vaten solen blyven den utgesat. Der vigen hebbe ic en lentelen korven vorkoft den luden, de se utwegen, dar sin to male snode korve mede, de sint bynnen al vol worme unde sin myt alle losch unde sciueten en wech, alzo se de worme geten hebben; der korve hebbe ic nue 2 gefuenden. Hir sin nue wol 600 korve Spanssche vigen komen, weren de nicht komen, ic wolde se en lenttelen over somer fueste vorkoft hebben, nue hebbe ik in 14 dagen neen 1 korff vorkoft. Ic welt dat beste darby doen, dat ik int vorkopen myt to der tyt, dat gi hir eynen senden, de dar nuetter to es. Ic hebbe hir ok mandelen, de my myn broder sante, al hedde he se dar laten blyven, dat hedde my leyver gewest, wante ic en hebbe, Got sy gelovet, nein geluecke darto to vorkopen, ic en wolde dan den veirden ₰ vorleysen.
Item Hildebrant, ic sende jue by Kort Mane ½ 1000 Swetssches werkes, dat stet 10 marc 10 scot, noch 11 timmer gudes Vinssches werkes, elk timmer 3 marc ½ ferd. Item noch in schipper Ereke 1 schimese myt 30 deker bocvellen, elk deker stet myt allem ungelde myt int schep 5 ferd 8 ₰.
Item so wetet dat hir mede es 1 deker clarer bocvelle, de hadden dey dreger vorgeten in dem huese, den sende ic jue in Johan Wolteken schimese in dessen selven schepe, op elk vel es jue merk gescreven unde op de horne kordes merk; unde dessen deker sal jue dar antworden Luedeke Schap. Anders en wet ik jue nue nicht to scrvyen, men ic wel jue in kort mer senden. Got sy myt jue. Gescreven des mandages vor sunte Jakoppe 1400 int 20.
Item so leget des soltes noch by 36 lesten unvorkoft, es begert nue neymant noch ter tyt duerer to kopen den 10 marc. Wy komen dar nicht wol mede to, dat stet uns 10½ marc ane ungelt unde et es Lyssebonesch solt, dat noch lycht. Est sake, dat gy es my nicht loven wolden, et es vor ogen, so mach ic et jue wol bewysen myt gueden lueden. Gy screven my to winter unde to vasten, gi wolden my wol tyt genouech scrvyen wan hir solt queme ofte komen solde. Hir quemen Hollander unde hadden solt van Baye, in Vlanderen gekoft vor 7 ℔ 5 sl., de geven et vor 10 marc 1 ferd., do bleff unse solt lycgen, oc meynen de lude, dat dar grot got van solte sole komen, men gi en screven my dar noch ny van, men gi screven my 1 ser swaren
: Briefwechsel Hildebrand Veckinchusen. Leipzig: S. Hirzel, 1921, Seite 152. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_275.jpg&oldid=- (Version vom 31.7.2018)
