Seite:Briefwechsel Hildebrand Veckinchusen 273.jpg

Dieser Text wurde anhand der angegebenen Quelle einmal korrekturgelesen. Die Schreibweise sollte dem Originaltext folgen. Es ist noch ein weiterer Korrekturdurchgang nötig.

	Wilhelm Stieda (Hrsg.): Briefwechsel Hildebrand Veckinchusen

Item so sal Hildebrant Lossekinch to Venedyen noch vorkopen dey paternoster, dey wy van unsem nabar hadden; darinne worden wy qualyken vorsument alumme dat es nicht quader dan quat tovorlat, God moytet beteren amen.

Item ramme des besten myt den karallen; doy sey Heyman mede to den Grypeswolde int marcket. Van den karalen, dey Hoyman hevet, so lat van elken 3 snore maken, 2 snore, sorte dey ghelyk, so sal men sey to bet vorkopen. Dey korten snore, dey in den bu^essen sin, 4 unde 5, dey wolden syk nicht vinden, to den anderen wellen sey syk vinden to den dey Heymann hevet, dat es my leyf, so sorte sey darto unde maket alse dat et gud werde unde darna dat syk vynden wyl.

Item so hebbe ick vorstan dat dey borghers sint ghesat op soldeners to holden unde harnsch int hus to hebben alse syk dat ghebort; myn 2 pansir unde dat koller unde hundeskoghel dyt es op Trudeken in der cleynen tuneken also sey wol weyt. Behoyvet men ander harnsch int hus, dat layt Hoyman kopen op dat wy hebben lyk unsen naber, darin wes vor seyn.

Item so es dey bomwulle noch ter Slus; sey quam nicht to mate in scheper Wylken van Dochem; sey sal nu myt den ersten schepe to Hamborch komen, welt God.

Item so hebbe ick Hoyman screven van den scharlaken unde dey gronne Yperssche unde Lyrssche laken, wat sey stan, dat hey dey vorkope myt dynem rade ein dels ofte al to borge ofte vorbuten umme ware, wo yt dat beste puntet, darin so ramme des besten. Mer dey Anxsterdammesche moyten al vorkoft sin umme reyt ghelt, op dat dey lude betalt werden.

Ick hebbe Hoyman ok screven van den karallen unde mussen, dat hey dey mede nemme int marcket to Grypeswol, ok dey mussen na dat et syk wyl vinden myt allen saken, darna ramet des besten.

Item so sendet dy Gherwin Marsschede ut Prusen in scheper Marquart Stubben 2 stroy wasses; noch ment hey dy mer to senden, God geve myt leyve, amen. Ick hope uns solle noch wol mer komen. Ick solde ghernne derwort komen, hedde ick es macht, mer doch ick sal my derwort maken myt dem aller ersten.

Item so mochte men dey karallen nicht altoghen, men mach wol van elker sorte ghen 3 snore ofte 4; solde man sey ok vorworpen ofte langhe borghen, dat wer nicht nutte. Darin ramet des besten. Hirmede so vart wol altos. Ghescreven op sunte Johannes avent ton myddensommer 1420 in Brugge.

Hildebrant Veckinchusen.

249. Eine Abrechnung zwischen Johannes Marschede, Hildebrand und Engelbrecht Veckinchusen. – 1420 Juni 25.

Rev. St.-A. Orig. Hand von Hildebrand Veckinchusen.