|
Wilhelm Stieda (Hrsg.): Briefwechsel Hildebrand Veckinchusen |
|
|
ik woldet solt schepen, wan de tyt queeme, alzo dat ik myt en overeinquam, dat se my solt vorkopen wolden, men ik solde en borgen setten; wan de tyt queme, so wolden se ere gelt ungetogert hebben. Leven vrende, ik en hebbe hir hues noch hoff, den ik to pande mach setten vor 5 ofte 600 mark; ik genk to mynem werde, den ik vor 1 vruent holde unde segede eme, ofte he vor my borge wolde sin vor ein stueck geldes. He segede my unse dink stet alzo, westue hir kopest umme wedder to vorkopen, dar sal ik mede an parten; dat es ok alzo. Aldues myt vele mer worden wart ik es myt eme eynsch, dat he 50 leste solde beholden op sin eventuer unde solde vort my behelpen sin myt al dem he mochte. Dat heft he ok gedaen; he hevet sin ingeselgel utgesat unde hevet gelovet, dar ik es nicht belovet, he heft sin gelt utgegeven, der dage es nue op meydach ok ein, dat wy gelt solen utgeven, wy weten dar noch gar leyne gelt to to betalen, doch so moet dat gelt op meydach betalt sin, et koste ok, wat et koste ofte wy moten 40 leste soltes al quit gan. Got geve, dat wy et noch wol utreyden moten, wy hebben reyde fueste ungelt utgegeven, jo doch vorneme ik jo neyne rysinge van deme solte, alsolde wy dat solt nue vorkopen op dessen dach umme dat solt mede to betalen, wy solden alzo drade gelt vorleysen alzo wynnen, wo gi jue dar anders laten duencken, dat men ton mynesten 4 mark sole wynnen op de last unde betalen de luede myt eresch selves gelde, wolde uns eymant 2 mark geven to bate op de last, ik wolde myt allen handen to tasten. Gy scryven my, ik wer wol 600 mark belovet op 2 weken ofte op 1 mant to betalen, ik wer darumme nicht na gebleven, ik en kan noch wet des nicht to merken, wor ik dan gelt solde nomen hebben op de 14 dage ofte op 1 mant na dem male dat gi my nicht en screven, dat ik dat gelt op jue over solde kopen. Ik hebbe nue gebeydet in de 12 weke sedder dat dat solt gekoft es, nochtant vorneme ik sulver noch golt noch neynerleye war, de gi my senden op solt mede to betalen. Ik hebbe hir neinen schat liggen, dat wetet. Hedde gi hir nue gelt gesant, ik wolde jue op dessen dach wol soltes genouech kopen. Et wart des anderen suenavendes na paschen[1] hir gegeven umme 11 mark de last, hedde ik gelt gehat, et hedde my ok to bode stan, al wolde ein man op dessen dach 1 frd. unde 11 mark utgeven, he kreges wol 40 ofte 50 last in dessen dage. Ik wolde dat et mer wolde gelden op dessen pingesten, so moetet al betalt sin, so moet et ok vorkoft sin, et gelde dan wat et gelde, et en sy dan dat gi hir gelt senden, dat men et mede betale. Vortmer so en hebbe wy des soltes noch nicht al untfangen to der wychte mer alzo uns geseget unde vorkoft es. So sal jue des soltes to lopen op jue eventuer by 60 laste, 2 leste myn ofte mer, des kan ik jue so uterliken nicht scryven myt to der tyt, dat et gewegen es. De gene, de jue geseget heft alle dink, wo duer dat solt gekoft es unde wovele, dat ik es hebbe doen kopen alze mer den 200 leste, den bringet my vor ogen, wan de tyt es ofte wan et jue geleyvet to doende unde lat en my bereken van weme ik dat solt gekoft hebbe, est dat sake, dat he my 1 last mer kan bereken den ik jue to reken. Wan ik dat solt untfa unde 1 frd. duerer reken wel den et gekostet hevet, so wel ik nicht stan vor 1 gueden gesellen. Ik hebbe darby
- ↑ 20. April.
: Briefwechsel Hildebrand Veckinchusen. Leipzig: S. Hirzel, 1921, Seite 141. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_264.jpg&oldid=- (Version vom 31.7.2018)
