|
Wilhelm Stieda (Hrsg.): Briefwechsel Hildebrand Veckinchusen |
|
|
Item so gaff ik Jakop Schuellten vor 10 ℔ gr., de Engelbrecht Veckinchusen to Brügge opnam van juewer wegen, summa 88 mark 3 frd.
Aldues wes de summa in al dat ik jue dyt jar gesant unde vor jue utgegeven hebbe 1032 mark unde 1 scot.
Summa in al dat ik jue gesant unde vor jue utgegeven hebbe sedder ik jue rekenscop screff es 3772 mark myn 21 ₰.
Aldues so sla ik 1 summa gegen de andere ave, so beholde gi by my, so wan my noch beter wert, dat men my van juewen laken schueldych es, alzo vorgescreven stet, 32 mark 12½ scot 13 ₰ Pruzsch unde to gueder rekenscop ofte ik my ergen ane vorsuemet hedde, dat wolde ik altyt gerne beteren wor ik kan. Gescreven des ersten suendages in der vasten 1400 in dem 20 jare Christi.
233. Hildebrand van dem Bokele aus Dorpat an Hildebrand und Engelbrecht Veckinchusen in Brügge. – 1420 Febr. 26.
- Rev. St.-A. Orig. Pap. Adr.: An Hildebrande und Engelbrecht Vockinchusen to Brugge kome desse breff. Darunter von H. V. Hand: 1420, 22 in aprylle.
Mynen willigen denst und wes ik gudes vormach to allen tyden, wetet leven Hildebrant und Engelberte Vockinchusen, dat ik juwen breff wol vornomen hebbe also umme al dat solt optokopen, dat to Revel were, des so wetet leven vrunde, dat op de tyt nicht 1 last to Revel ofte to der Narwe to kope was, wante alle dat solt, dat to Revel was to kope, dat was van dar vart, er ik van Revel towet[1]. Ik sande dar enen knechte hene und hebbet myt Johanse van der Borch vorwart, kan he emende hebben, de solt leveren wil op den somer, dat sal he kopen to unser behoff, dat sal he ok truwelike don dat weit ik wol. Item so hebbe wy hir koft by 100 lasten mestelich dat gelt uttogeven op paschen[2] mer dan 800 mark, dyt gelt mote wy vere hir besorgen und dat ander op sunte Johannes[3] dach yk hebbe al myn dinch to Nouwerden sant umme rede gelt to maken. Item so hebbe wy ok by 40 lesten koft to Revel to leveren op sunte Johannes dach unt wanner dat wy dat solt untfan, so mot dat gelt rede wesen und wes uns Hans van der Borch darto kopet dat mot ok also wesen, hirumme leven vrundes dot wol und maket jo also, dat gy my wat senden, dar ik rede gelt van make wante sendet my Marschede ut Prusen solt, dar wel waste ungelt oplopen, men dar is gut darmede. Ik wels wol also wol vorkopen, dat ik dat ungelt mede betale; anders en weit ik ju sunderlinges nicht to schryven mer, ik wil gerne dat beste don dat ik kan und mach. Hirmede syt unse leven heren Gode bevolen to ewegen tyden und beydet alle wege over my und grotet alle vrunt sere. Geschreven des ersten mandages in der vasten 1420 jar in Darpede.
: Briefwechsel Hildebrand Veckinchusen. Leipzig: S. Hirzel, 1921, Seite 134. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_257.jpg&oldid=- (Version vom 31.7.2018)
