|
Wilhelm Stieda (Hrsg.): Briefwechsel Hildebrand Veckinchusen |
|
|
stont 5 frd., noch 2 tymmer 4 marten, 1 gink bynnen, de stonden 46 mark 11 scot; noch 13 tymmer schonewerkes, de stonden 42½ mark 3½ scot. De tymmer stont myt ungelde 12½ scot, summa hirvan es 103 mark 9 scot. Op desse tyt gaff ik schipper Mertin Tergouwen, dat he jue to Bruegge dan hadde, 12 ℔ gr., summa es 100 mark 12 scot.
14 dage na sunte Johannes dage[1] do gaff ik her Johan Wynracken vor 30 ℔ gr., de gy ok to Bruegge untfengen, summa hirvan to gelde es 250 mark unde 5 frd.
Op Domenicke[2] gaff ik schipper Hermann Wydenbrueggen vor 10 ℔ gr. 80 mark.
8 dage na Domenick[3] gaff ik her Johan Terayx vor 15 ℔ gr. 125 mark.
Des andern dage na unserer leven vrouwen worcewyunge[4] sante ik jue to Lubeke wart by Lodewige van deme Holte 43 Rynsche gulden; elk stont 1 mark 4 schot, ein Lub. gulden stont 1 mark 10 schot, 3 cleine stuecke suelvers, wouegen 6 mark 8 schot 1 quartyr lodych, de mark stont 6½ mark myn ½ scot, summa beyde van golde unde van sulver es 92 mark 41 schill.
Darnest op sunte Mertine[5] gaff ik Herman von der Beke vor 100 Lub. mark 137 mark 1 schot, de gi van eme to Lubeke hadden untfangen. Op desse selve tyt gaff ik Kort Elhorne 133 mark 8 scot, alzo vor 100 Lub. mark, de gi dar untfengen van schipper Hinryk Heysen.
Darnest 8 dage vor des hilligen Krystes dage[6] gaff ik hir Meywes Groninge 100 Mark, de gi ok to Lubeke hadden opgehoven, van Radeken Wyntzenberge, love ik. Op desse selve tyt gaff ik Kort Elhorne unde schipper Hinryk Heysen 133 mark 8 scot, alzo vor 100 Lub. mark, de gi dar ok untfangen hadden van schipper Hinryk Heysen. Aldues so es de summa in al dat ik vor jue utgeven hebbe unde jue gesant hebbe dyt jar 2740 mark 20 scot myn 6 ₰.
Int jar Christi in den 19 jare op paschen[7], do gaff ik Herman van der Beke 80 mark, de gi untfengen to Luebeke van Hinryk van der Beke.
Darnest 4 dage vor unser leven vrouewen dage to worcewyunge[8] sante ik jue to Lubeke wart in schipper Marquart 2 stro, 1 tunne. Hir hadde gi inne 12 stuecke wasses, de wougen 26 stene myn 2 punt, de sten stont myt allen ungelde myt int schep 4 mark myn 16½ sl., summa hirvan es 96 mark unde 15 scot.
Darnest op sunte Mertine[9] gaff ik Gerde von Muensteren, dat gi to Lubeke untfangen hadden 300 mark. Noch gaff ik Hinryk Kasstorpe unde Johan van Bouechem 150 mark. Noch gaff ik Radeken Wyntzenberge 150 mark. Noch gaff ik Gerde van Muensteren unde Hermanne van der Beke 167 mark myn 8 scot. Dyt gelt hebbe gi al to Lubeke van dessen vorgescreven luden untfangen, alzo gi wol selven weten.
: Briefwechsel Hildebrand Veckinchusen. Leipzig: S. Hirzel, 1921, Seite 133. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_256.jpg&oldid=- (Version vom 31.7.2018)
