|
Wilhelm Stieda (Hrsg.): Briefwechsel Hildebrand Veckinchusen |
|
|
dat in handen unde ic kan des geldes nicht van em krygen; met Hans es quat doen, wat geldes hey in handen kryget, dat steyt nicht weder van em to krygen. Juowe lobben lyggen hyr noch unvorkoft unde ok des rakelvysch eyn del unde juowe was es vorkoft to Francvord unde hyr. Unde ic hebbe juowe schult hyr al betalt unde ic wel ju in kord rekenscap scryven unde ic wolde, dat gy dyt jar hedden neyn gud herward int lantt ghesand unde so mochte ic lychte to Lubeke komen hebben unde ander dync utrichtet unde slechtet hebben unde ic wolde gerne vor pynxten[1] to Lubeke wesen unde so sege ic gerne, dat gy dar ok weren umme vele sake wyllen. Unde dat wel hyr op dem Ryne unde in dessen lande also ovele staen, dat neymand nerge komen kan unde neymand denket hyr nergen op dan op orloge unde myn here van den Berge loget met dessen borgern unde vele ryddern unde hern to velde vor eyme slote mer dan met 6000 manen unde men sendet em al dage mer lude to also dat dyt to male eyn hard orloge werden wel. Got vorseyt al umme met den besten. Grotet myn suster unde al vrunt unde sendet mynen kyndern ere nottroft unde Anneken wand to eyme rokke unde doet in al dat beste. Ghescreven op sunte Gregoryus dach anno 19 jar.
206. Gerwin Marschede an Hildebrand Veckinchusen in Brügge. – 1419 Mai 10.
- Rev. St.-A. Orig. Pap. Adr.: An den erbaren man Hildebrant Veckinchusen to Brugge littera detur. Darunter von H. V.s Hand: Gherwin Marschede hevet op my ghekoft, dat ik gheven sal Gosschalk Krouwel 10 ℔ groten. Betalt dey 10 ℔ gr. Gosschalk Krouwelle.
Vruntlike grote vorgescreven an mynen leven vruent Hildebrant Veckinchuesen, weten sole gi, dat ik hir opgenomen hebbe van Hinryk Slechter 81 marc 1 ferding. Hirvor sole gi gheven Gosschalk Krouewel to Bruogge 14 dage na juwen erste breyven 10 ℔ gr. nyes geldes. Ik bidde jue, dat gi desse 10 ℔ to danck wellen untrychten, dat ik dar neine wort van en dorven horen, wante ik et jue aldues lange gelent hebbe unde konde nue nicht bet, ik en mostet opnemen. Ok stet my noch by 100 marc ute van juwen laken, dat ik reyde vor jue utgegeven hebbe, dat my ok neinen vromen inbringet; de betalinge es hir myt alle queaet, des lovet my. Got sy myt jue. Gescreven 3½ weken na paschen 1400 int 19 jar.
207. Gerwin Marschede an Hildebrand Veckinchusen in Brügge. – 1419 Mai 10.
- Rev. St.-A. Orig. Pap. Adr.: Deme erbaren manne Hildebrant Veckinchuesen in Bruegge littera detur.
- ↑ Pfingsten 1419 am 4. Juni.
: Briefwechsel Hildebrand Veckinchusen. Leipzig: S. Hirzel, 1921, Seite 43. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_230.jpg&oldid=- (Version vom 31.7.2018)
