|
Wilhelm Stieda (Hrsg.): Briefwechsel Hildebrand Veckinchusen |
|
|
dyt was kostede to bergen unde wedder to beryven unde wedder to schepe to bringen 1½ mark 4 scot. Dyt was sante ik jue to Lubeke wart in schipper Gernt von Pargam 4 dage vor sunte Mertine[1]. Aldues so stet dyt was unde botter tosamen 148 mark 4 scot. De tunne botteren stet hir noch op jue eventuer. Item so sante ik jue noch by denselven Gernt van Pargam 3 cleine stuecke sulvers, de wouegen 5 mark 8½ scot, de mark stont 6 mark 11 scot. Summa hirvan es 34 mark 14 scot myn 9 ₰.
Item 3 weken na Mychgele[2] des sante ik jue to Lubeke wart by Wolter Bysschoppe 3 stuecke sulvers, de wougen 10 mark 1 scot lodych. De mark stont 6 mark 11 scot 6 ₰. Noch by dem sulver was 20 Rinsche guelden; elk gulde stont 1 mark unde 16 sl. Summa hirvan es 91 mark 1 sl.
Summa hirvan es tosamen gerekent, es 273 mark 3 frd. 3 ₰.
Aldues so es de summa in al dat ik jue dyt jar gesant unde vor jue utgegeven hebbe, 4408 mark unde 22 scot myn 5 ₰. Aldues so es de summa in al dat ik jue wedder gesant unde vor jue utgegeven hebbe 7000 mark 22 scot 7 ₰. Aldues so sla ik eine summa jegen dey ander, aldues so blive ik jue noch schuldych wan ik al betalt werde, dat my noch utestet 746½ mark unde 50 ₰. Vortmer so beholde gy noch by my stan unvorkoft 2 bale komyn unde ½ gra Herentalsch laken; wan dyt vorkoft es, so wel ik et jue, ofte Got wil, senden.
Item Hildebrant overseyt desse rekenschop. Est sake, dat ik my ergen ane vorrekent ofte vorscreven hedde, dat wil ik gerne vorbeteren. Borde my ok wes dat my avegenge, desgeliken begere ik wedder van jue.
Hildebrant, guede vrent, ik wolde dat Got wolde, dat ik hir bet gedaen hedde konen, so wet es Got, dat ik dat van alle mynen herten unde willen gerne hedde gedaen, men ik en haddes leyder keyne macht, alzo gy ok lychte wol horen mogen van anderen lueden, wo dat de hanttiringe hir vorgeyt unde wat wy vorkopen, dat es al borch borchgen. Vortmer so hebbe ik fueste gelt vor breyve utgegeven, des ik nicht en reken, wante ik en wet nicht wo vele des es. Vortmer so wetet, leve Hildebrant, dat gelt, dat gy nue by my beholden, des wetet, dat ik dat nicht an reyden gelde en hebbe. Ik vorkofte 1 gesellen ton Holme wart 3 Ypersche, 2 stuecke van den kruempen unde geschoren, 14 stene ryses, 3 stene 9 punt komels. Dat gelt solde my vor sunte Michgele unde vor sunte Merten al sin tor hant komen unde hevet de wint de schepe ein anderen wech gebracht, ein schep es tom Sunde komen, dar hadde he inne op 100 mark, noch 1 schip, dar hadde he my inne gesant dat ik al betalt solde sin gewest, dat en es noch nergen to luden komen, Got geve, dat et beholden mote sin. Vortmer van den Konditschen stet my ok noch vele ute. Dat halve Leydesch dede ik to borge 1 manne to Schwelbene wart nue in 14 dagen unde 2 Oldenardesche to Stolpe wart, de 2 werden wol betalt. Vortmer so stet my noch to Kosseline 1 Yppersch vor 34½ mark: dat solde ik to Mychgele betalt hebben hat, dat es ok wys gelt. Vortmer so stet my van den ryse unde komel, rosinen noch fueste gelt ute. Des ryses weren 4 vate nat worden, dat schadde jue mer den 12 stene. Der rosinen was ein cleine korff al vordorven, de gaff ik vor 1 mark op paschen to betalen.
: Briefwechsel Hildebrand Veckinchusen. Leipzig: S. Hirzel, 1921, Seite 16. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_203.jpg&oldid=- (Version vom 31.7.2018)
